Meithrin y Genhedlaeth Nesaf o Ymchwilwyr Medrus

Y Comisiwn Brenhinol fydd un o’r cyrff a fydd yn elwa ar grant sylweddol gan Gyngor Ymchwil y Celfyddydau a’r Dyniaethau (AHRC) i hybu hyfforddiant ac ymchwil ôl-raddedig.

Roeddem yn rhan o gynnig a gyflwynwyd gan yr wyth prifysgol (gan gynnwys Aberystwyth a Chaerdydd, a chyrff eraill sydd â phrofiad helaeth o ymchwil ym meysydd archaeoleg a hanes) sy’n perthyn i Gonsortiwm y De, y Gorllewin a Chymru. Bu’r cynnig yn llwyddiannus, a dyfarnwyd £14.2 filiwn i’r Consortiwm. Bydd hyn yn cynnal oddeutu 200 o ysgoloriaethau ymchwil ôl-radd dros gyfnod o bum mlynedd, gan ddechrau yn y flwyddyn academaidd nesaf. Bydd yn darparu cymorth arloesol i raddedigion drwy roi cyfle iddynt feithrin medrau ehangach wrth gael profiad o weithio y tu allan i’r byd academaidd ar leoliadau diwydiannol a rhyngwladol.

Dywedodd yr Athro Rick Rylance, Prif Weithredwr yr AHRC: “Dyma gam cyntaf pwysig a fydd yn galluogi myfyrwyr ôl-raddedig yn y celfyddydau a’r dyniaethau i gael yr hyfforddiant a chymorth gorau posibl, ac a fydd yn arwain at ddatblygu dull o gydweithio sy’n cyfuno arbenigedd ac yn ehangu gorwelion yr ymchwilwyr. Rydyn ni’n hynod falch o’r ffordd mae’r sector, a phartneriaid y tu hwnt i’r sector, wedi ymateb, ac edrychwn ymlaen at weithio’n agos gyda nhw i gefnogi’r genhedlaeth nesaf.”

Bydd y Comisiwn yn cyfrannu drwy gynnig profiad gwaith a hyfforddiant i fyfyrwyr ôl-raddedig yn y meysydd lle y mae gennym arbenigedd. Y flwyddyn nesaf, byddwn yn ystyried sut y gallwn ddatblygu cyfleoedd pwysig ar gyfer prosiectau ymchwil cydweithredol a sut y gallant gyd-fynd orau â’n gwaith, a’r Cofnod Henebion Cenedlaethol.

I ddarganfod mwy am y grant hwn, ewch i wefan yr AHRC.


Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

Rydym hefyd ar gael ar:
Twitter Hashtag: #RCAHMWales