Cymorth Torfol i Ddarganfod Hoff Adeilad Cymru

Mae Daniel Drave, myfyriwr israddedig sy’n dilyn cwrs Cyfrifiadureg ym Mhrifysgol Aberystwyth, yn egluro ei waith gyda thîm Data a Thechnoleg y Comisiwn Brenhinol:
 
Fel y sawl sydd wedi datblygu’r rhaglen ffôn symudol a gwasanaeth gwefan My Favourite Building, rydw i wedi gallu ehangu fy ngwybodaeth o’r byd gwaith proffesiynol, gwella fy sgiliau rhaglennu cyfrifiadurol a chyfrannu i un o raglenni’r Comisiwn Brenhinol yn Aberystwyth. Yn swyddogol, rydw i’n gweithio ar leoliad gwaith gydag un o adrannau polisi Llywodraeth Cymru, sef CyMAL: Amgueddfeydd, Archifdai a Llyfrgelloedd, ac estyniad o hyn yw fy lleoliad gyda’r Comisiwn Brenhinol.

Dan yn gweithio ar y prosiect.

Cafodd y syniad o greu ‘app’ ffôn symudol cymorth torfol (crowd-sourcing) ym maes treftadaeth ddigidol, i gefnogi cyfraniadau defnyddwyr i wefan Casgliad y Werin Cymru, ei awgrymu i CyMAL gan Tom Pert, Rheolwr Datblygu Ar-Lein y Comisiwn Brenhinol. Gan fy mod i wedi meithrin sgiliau addas drwy astudio Cyfrifiadureg ym Mhrifysgol Aberystwyth, cynigiais arwain y gwaith o ddatblygu’r app.

Hafan My Favourite Building.

Bydd yr app cymorth torfol yn caniatáu i ddefnyddwyr dynnu ffotograffau o’u hoff adeilad hanesyddol drwy ddefnyddio’r camerâu ar eu ffôn clyfar. Yna byddant yn gallu ychwanegu testun i esbonio pam mai hwn yw eu hoff adeilad a llwytho’r cofnod i fyny i wasanaeth gwe. Mae’r gwasanaeth gwe yn darparu rhyngwyneb defnyddiwr deniadol ar gyfer gweld eich cyfraniadau eich hun a chyfraniadau pobl eraill, ac mae’n cynnig mynediad i wasanaethau eraill, gan gynnwys rheoli proffiliau a chwiliadau cyflym. Bydd gweinyddwyr safleoedd neu arweinwyr prosiectau cymunedol lleol hefyd yn gallu creu prosiectau newydd, gan ganiatáu i ddefnyddwyr uwchlwytho cynnwys newydd ar gyfer amrywiaeth eang o bynciau. Enghreifftiau posibl o brosiectau o’r fath fyddai ‘Fy Nhafarn Leol’ neu ‘Fy Hoff Safle Treftadaeth’. Mae’r app yn hyblyg iawn a’r gobaith yw y caiff ei defnyddio mewn gwahanol sefyllfaoedd, o ddefnydd hamdden i weithdai addysgol.

Sgrin mewnbynnu data (chwith) a sgrin cofnod cyflawn (de) ar yr app My Favourite Building.

Mae’r gwaith datblygu bron wedi’i gwblhau a bydd prototeip o’r app a’r wefan ar gael i’w profi gan ddefnyddwyr erbyn canol Chwefror. Bydd yr app ar gael ar gyfer y system weithredu Android, ac mae’r wefan wedi cael ei hoptimeiddio ar gyfer Mozilla Firefox.

Os  hoffech chi wybod mwy am y prosiect My Favourite Building, mae croeso i chi gysylltu â: tom.pert@cbhc.gov.uk

Tanysgrifiwch i Newyddion Treftadaeth Cymru a chofrestrwch ar gyfer yr RSS porthiant llawn: cliciwch y botwm RSS hwn a thanysgrifiwch!

Rydym hefyd ar gael ar:
Twitter Hashtag: #RCAHMWales